Piparkökuhúsleikur

Það er fátt sem vekur upp jafn ljúfar jólaminningar og ilmurinn af nýbökuðum piparkökum, glassúr á fingrunum og gleðin sem fylgir því að skapa eitthvað fallegt saman. En piparkökuhúsabakstur hefur lengi verið kærkominn hluti af jólaundirbúningi fjölskyldna um land allt og nú ætlar Kringlan og Katla að endurvekja þessa fallegu hefð.

Piparkökuhúsaleikur Kötlu var fyrst haldinn árið 1993 og hefur í gegnum tíðina glatt bæði unga sem aldna í aðdraganda jóla.

Við hvetjum fjölskyldur, vinahópa og öll þau sem hafa gaman af því að skapa til að gefa sér notalega stund saman, leyfa hugmyndafluginu að njóta sín og töfra fram sitt eigið piparkökuhús.

Yngstu bakararnir fá líka að láta ljós sitt skína! Í ár verður sérstakur barnaflokkur þar sem börn 12 ára og yngri geta tekið þátt með sínum eigin piparkökuhúsum. Við hvetjum því litla sem stóra bakara til að láta hugmyndaflugið njóta sín og taka þátt í þessari skemmtilegu jólahefð.

Hvort sem það er lítið og krúttlegt, stórglæsilegt eða alveg út fyrir kassann er um að gera að láta sköpunargáfuna ráða för. Það sem skiptir mestu máli er að njóta samverunnar og búa til fallegar jólaminningar.

Að sjálfsögðu hvetjum við þátttakendur til að nota Kötlu vörur í piparkökuhúsin sín, Katla er með tilbúið piparkökudeig og glassúr sem aðeins er með náttúrulegum litarefnum.

Og það er svo sannarlega til mikils að vinna. Glæsileg verðlaun eru í boði, KitchenAid hrærivél, gjafakort í Kringluna, gjafabréf í Hagkaup, gjafakarfa frá Kötlu, og fatnaður frá 66°Norður.

Öll piparkökuhúsin sem taka þátt verða síðan til sýnis í Kringlunni í aðdraganda jóla, þar sem gestir geta notið þess að skoða húsin og tekið þátt í gleðinni með því að kjósa fallegasta piparkökuhúsið. Það verður því spennandi að fylgjast með hvaða hús heilla gesti mest!

Nú er um að gera að kalla saman fjölskylduna eða vinahópinn, bretta upp ermar og hefjast handa! Hver veit nema ykkar piparkökuhús verði vinningshúsið!

Við hlökkum til að sjá húsin og fylla Kringluna af piparkökuilmi, sköpunargleði og sannkallaðri jólastemningu!