Love Island leitar að keppendum á Íslandi

Aðstandendur hins geysivinsæla raunveruleikaþáttar Love Island tilkynntu nýlega að í næstu þáttaröð, þeirri elleftu, myndu keppendur frá öllum heimshornum etja kappi. Leit að þátttakendum stendur um þessar mundir yfir víða um heim og þar á meðal á Íslandi, en opnar prufur verða haldnar nú um helgina.

Áætlað er að ellefta serían fari í loftið í janúar næstkomandi. Aðdáendur þáttanna bíða þó einnig spenntir eftir tólftu þáttaröðinni, sem sýnd verður sumarið 2024, en það er svokölluð all-star sería þar sem vinsæl pör úr eldri þáttaröðum etja kappi.

Fyrir áhugasama Íslendinga munu útsendarar á vegum bresku sjónvarpsstöðvarinnar ITV, sem framleiðir þættina, verða með bækistöðvar í Kringlunni á laugardag. Aðeins verður hægt að skrá sig á staðnum og er áhugasömum bent á að koma að þjónustuborði milli kl. 11 og 17 og fylla þar út tilskilin eyðublöð, en prufurnar sjálfar fara svo fram dagana tvo í nýju rými á þriðju hæð Kringlunnar.