Frétt
25. febrúar 2010
Kringlan flokkar 23% af öllu sorpi
Kringlan flokkaði 23% af öllu sorpi í fyrra
-stefnt á að hlutfallið verði 40% árið 2012
-rekstrarkostnaður lækkaði um 2,1 milljón
-flokkun á öllum lífrænum úrgangi hefst í ár
Verslunareigendur og starfsfólk Kringlunnar flokkaði um hundrað tonn af sorpi árið 2009. Þetta lætur nærri að vera 23% af öllu sorpi sem féll til í tengslum við rekstur verslunarmiðstöðvarinnar. Í byrjun árs hóf Kringlan að flokka sorp og var við það tilefni tilkynnt um það markmið Kringlunnar að í ársbyrjun árið 2012 verði 40% af öllu sorpi flokkað. Ljóst má því vera af reynslun fyrsta árið að raunhæft er að ná þessu markmiði.
Minni rekstrarkostnaður og samfélagsleg ábyrgð
Í Kringlunni er allur bylgjupappi, plast, dagblöð/tímarit og drykkjarumbúðir flokkaður. Markmiðið með flokkuninni er einkum tvíþætt. Með hverju flokkuðu kílói af sorpi sparast 21 króna, þar sem greiða þarf 15 krónur fyrir urðun á hverju kílói af óflokkuðu sorpi. Þá fást greiddar 6 krónur fyrir hvert kíló af flokkuðum pappa og plasti. Lætur því nærri að segja að rekstrarkostnaður Kringlunnar á þessu sviði hafi lækkað um rúmar tvær milljónir króna árið 2009.
Í annan stað er markmið með flokkuninni að Kringlan axli samfélagslega ábyrgð og stuðli að umhverfisvænu samfélagi.
Verslunareigendur og starfsfólk verslana spila stórt hlutverk í þessu verkefni en markmiðið Kringlunnar er að innan þriggja ára náist 40% flokkun á almennu sorpi í Kringlunni en árlega falla til 500 til 700 tonn af sorpi í húsinu.
Eftir fyrsta árið er meðalflokkun í Kringlunni allri 23% sem þýðir að um 100 tonn af sorpi var flokkað frá þeim rúmum 500 tonnum sem féllu til á árinu 2009. Á árinu 2010 er lagt upp með að taka næsta skref í þessu verkefni og hefja flokkun á lífrænum úrgangi frá öllum veitingastöðum í Kringlunni en sá úrgangur vigtar þyngst og er því dýrastur þegar kemur til urðunar.
Umhverfislegur ávinningur af flokkun í Kringlunni árið 2009
Árið 2009 féllu til tæp 100 tonn af bylgjupappa hjá Kringlunni. Umhverfislegur sparnaður af flokkuninni er umtalsverður.
Til þess að framleiða nýjan bylgjupappa (e. virgin cardboard) þarf að nota tré, en þau eru unnin með sérstakri tækni sem býr til pappamassa og úr því bylgjupappa. Þegar bylgjupappi er endurunninn þarf hinsvegar endurvinnslu hráefni s.s. ónýtan bylgjupappa (e. old corrugated cardboard). Hráefnið er leyst upp og framleiddur nýr bylgjupappi.
Með endurvinnslu er hægt að draga úr álagi á auðlindir jarðar. Þess í stað búum stuðlum við að hringrás hráefna sem við getum nýtt aftur og aftur. Bylgjupappa má endurvinna allt að sjö sinnum án þess að hann tapi nokkru af þeim gæðum sem hann hafði í upphafi. Hér að neðan er upptalning á þeim umhverfislega sparnaði sem verslunareigendur og starfsfólk Kringlunnar náði með því að flokka allan bylgjuappa frá Kringlunni:
· Hráefnið sem féll til samsvarar því sem nemur að höggva um 1.780 fullvaxin tré.
· Ef bylgjupappinn hefði farið til urðunar hefði þurft landsvæði sem nemur 314,3 rúmmetrum. Það samsvarar því plássi sem 20 skipagámar taka.
· Rafmagn er ein af lykilauðlindum í framleiðslu á bylgjupappa. Með því að endurvinna hráefnið sparaðist sem samsvarar u.þ.b. 297.000 KW stundum. Það magn dugar til að knýja um 82 heimili á Íslandi í eitt ár.
· Önnur lykilauðlind í bylgjupappaframleiðslu er vatn. Með því að endurvinna pappa getum við dregið úr vatnsnotkun sem svarar heildar vatnsnotkun einnar manneskju í sjö ár eða því magni sem þarf til að fylla þrjár 25 m sundlaugar.
· Olía er ein af þeim auðlindum sem þarf að nota til að framleiða bylgjupappa. Með því að endurvinna er umtalsvert dregið úr olíuþörf til framleiðslunnar. Samtals sparaði Kringlan því sem nemur 895 olíutunnum árið 2009.
Hér að ofan höfum við rakið umhverfislegan ávinning sem hlýst af því að flokka bylgjupappa í Kringlunni. Um margt eru þetta sláandi tölur og gefa til kynna að verkefnið sé á réttri leið.
Til baka